Hugvíkkandi vinna felur í sér innri vinnu og sjálfsskoðun samhliða notkun hugvíkkandi efna í meðferðartilgangi. Hún getur meðal annars farið fram með smáskömmtun, þar sem teknir eru litlir skammtar með reglulegu millibili, eða með stærri skömmtum í stökum meðferðarlotum þar sem meðferðaraðili heldur utan um ferlið og styður einstaklinginn.

Hugvíkkandi reynsla getur opnað fyrir nýja sýn á okkur sjálf, hjálpað okkur að koma auga á gömul mynstur, vinna með tilfinningar og dýpka tengslin við okkar innri heim. Reynslan ein og sér leiðir þó ekki endilega til varanlegra breytinga. Það skiptir máli hvernig við vinnum úr henni og nýtum þann lærdóm sem hún færir okkur í daglegu lífi.

Þegar við tölum um hugvíkkandi vinnu hjá Hjartasetrinu eigum við við meðvitaða sjálfsvinnu í tengslum við hugvíkkandi reynslu. Okkar áhersla er á að styðja fólk í undirbúningi og eftirvinnslu hugvíkkandi meðferða.

Þótt hugvíkkandi efni geti boðið upp á mikla og jákvæða möguleika fylgja þeim einnig áhættuþættir. Þess vegna leggjum við ríka áherslu á að nálgast þessa vinnu af ábyrgð, virðingu og meðvitund.

Námið hjá Hjartasetrinu er byggt upp sem heildstætt ferli þar sem fræðsla, sjálfsvinna og verkleg reynsla fléttast saman. Við leggjum áherslu á að þátttakendur öðlist ekki aðeins fræðilega þekkingu heldur fái einnig tækifæri til að dýpka eigin sjálfsskilning og tengja það sem þeir læra við sína persónulegu reynslu.

Kennslan fer fram í blöndu af staðbundnum hóptímum, netkennslu, verkefnum og verklegum æfingum.

Fyrirkomulagið er mismunandi eftir námskeiðum. Í grunnnáminu, Level 1, er lagður grunnur að skilningi á hugvíkkandi vinnu. Í framhaldsnáminu, Level 2, er farið dýpra í verklega þjálfun, einstaklingshandleiðslu og að styðja aðra í þeirra persónulegu vegferð.

Hluti námsins fer einnig fram á retreati erlendis.

Markmið okkar er að skapa nám sem snýst ekki aðeins um að afla sér þekkingar, heldur einnig um að þroskast sem manneskja.

Level 1 er grunnnámskeið þar sem farið er yfir grundvallaratriði hugvíkkandi meðferðarvinnu. Engin fyrri reynsla er nauðsynleg og ekki er gerð krafa um að þátttakendur ætli sér að starfa á þessu sviði.

Námskeiðið er byggt upp sem persónuleg vegferð þar sem við vinnum út frá hugmyndafræðinni learning by doing - að læra í gegnum eigin reynslu. Samhliða persónulegri sjálfsvinnu kynnum við sögu hugvíkkandi efna, fræðilegan grunn og mikilvæga þætti sem snúa að ábyrgri og meðvitaðri hugvíkkandi vinnu.

Level 2 er framhaldsnámskeið fyrir þau sem hafa nú þegar reynslu af því að vinna með skjólstæðingum og vilja nýta þekkinguna í sínu starfi. Sú reynsla þarf ekki að vera úr hugvíkkandi meðferðarvinnu. Námið hentar einnig meðferðaraðilum sem starfa á öðrum sviðum en vilja geta stutt skjólstæðinga sína í undirbúningi og eftirvinnslu hugvíkkandi reynslu.

Í Level 2 förum við dýpra í fræðin og flóknari þætti hugvíkkandi vinnu. Námskeiðið er töluvert verklegra en Level 1 og þátttakendur fá meðal annars úthlutaðan skjólstæðing úr sjálfsstyrkingarnámskeiði Hjartasetursins sem þeir styðja í gegnum undirbúning og eftirvinnslu, undir handleiðslu okkar.

Ólíkt Level 1 er Level 2 ekki fyrst og fremst hugsað sem persónuleg vegferð, heldur sem tækifæri til að þróa faglega færni og öðlast reynslu af því að styðja aðra.

Í einföldu máli:

Level 1: Við sýnum þér hvernig við vinnum með því að leiða þig í gegnum ferlið.

Level 2: Nú er komið að þér að leiða aðra í gegnum ferlið, undir okkar handleiðslu.

Í eigin krafti er sjálfsstyrkingarnámskeið fyrir þau sem vilja dýpka tengslin við sjálf sig, efla sjálfsþekkingu og öðlast meira frelsi til að lifa lífinu á eigin forsendum.

Námskeiðið byggir á bókinni Lífsreglurnar fjórar eftir Don Miguel Ruiz og er persónuleg vegferð þar sem við vinnum með gömul mynstur, takmarkandi viðhorf, samskipti, mörk og tengslin við okkur sjálf.

Með fræðslu, sjálfsskoðun, samtölum og verklegum æfingum fá þátttakendur tækifæri til að skoða hvernig fyrri reynsla og lærð viðhorf hafa mótað líf þeirra og hvernig hægt er að skapað meðvitaðar breytingar.

Rýmishald snýst um að skapa öruggt og styðjandi umhverfi þar sem einstaklingur fær tækifæri til að mæta sjálfum sér og því sem kemur upp.

Gott rýmishald byggir á nærveru, samkennd, virðingu og hæfileikanum til að hlusta án þess að dæma eða reyna að breyta upplifun annarrar manneskju.

Það felst ekki endilega í því að hafa svörin eða vita hvað sé best fyrir aðra, heldur að geta verið til staðar, sérstaklega þegar krefjandi tilfinningar koma upp.

Mikilvægur hluti rýmishalds er að þekkja eigin mörk, vera meðvitaður um eigin viðbrögð og taka ábyrgð á því valdi sem fylgir því að styðja aðra.

Öruggt rýmishald skiptir máli vegna þess að þegar við finnum fyrir öryggi og upplifum að okkur sé mætt án þess að vera dæmd, getur skapast rými til að skoða viðkvæma parta af okkur sjálfum og vinna með það sem annars getur verið erfitt að nálgast.

Í grunninn snýst rýmishald ekki um að leiða aðra þangað sem við teljum að þeir eigi að fara, heldur að skapa aðstæður þar sem þeir geta fundið sína eigin leið.

Já, hjá Hjartasetrinu bjóðum við upp á fjölbreytta einstaklingsmiðaða vinnu þar sem áhersla er lögð á sjálfsþekkingu, persónulegan þroska og tengslin við okkur sjálf.

Við sérhæfum okkur í undirbúningi og eftirvinnu hugvíkkandi reynslu, þar sem við styðjum einstaklinga við að undirbúa sig af ábyrgð og meðvitund, ásamt því að vinna úr reynslunni og samþætta hana daglegu lífi.

Samhliða því bjóðum við upp á einstaklingsviðtöl og fjölbreytta líkamsmiðaða vinnu (somatic work), meðal annars craniosacral-meðferð, tónheilun, reiki-heilun, sjamaníska heilun, einkatíma í öndunarvinnu og vatnsmeðferð.

Þessi þjónusta er opin öllum og þarf ekki að tengjast hugvíkkandi reynslu. Markmið okkar er að mæta hverjum einstaklingi þar sem hann er staddur og skapa rými fyrir þá vinnu sem hann vill og þarf að vinna með sjálfum sér.

Eftirvinna, eða integration, snýst um að vinna úr hugvíkkandi reynslu, öðlast dýpri skilning á henni og nýta þann lærdóm í daglegu lífi.

Hugvíkkandi reynsla getur opnað fyrir djúpar tilfinningar, nýja innsýn og aukinn skilning á gömlum mynstrum og lífsreynslu. En djúp upplifun leiðir ekki sjálfkrafa til varanlegra breytinga.

Samþætting felst í að gefa reynslunni tíma og rými, meðal annars með samtölum, sjálfsskoðun, líkamsmiðaðri vinnu og meðvituðum breytingum í daglegu lífi.

Hjá Hjartasetrinu leggjum við ríka áherslu á eftirvinnu, því það sem skiptir máli er ekki aðeins hvað við upplifum, heldur hvernig við vinnum með reynsluna og tökum skref í átt að þeirri breytingu sem við viljum sjá.

Undir “Viðburðir” á heimasíðu Hjartasetursins má finna yfirlit yfir þau námskeið sem eru í boði hverju sinni.

Með því að velja námskeið getur þú opnað PDF-skjal með ítarlegri upplýsingum um innihald námsins, fyrirkomulag og þátttöku.

Á síðustu síðu skjalsins finnur þú allar upplýsingar um umsóknarferlið og hvernig þú getur sótt um þátttöku.